Liewe Kliënte en Assosiate
Desember 2014
2014 snel verby en soos altyd is dit weer ons voorreg om ons praktyk se
hoogtepunte van die jaar met julle te deel.
Geen bestaande of nuwe kliënte het hierdie jaar afgetree nie. Nuwe kliënte
wat bedank het, het deur middel van verwysings vanaf bestaande kliënte by ons
aangesluit. Baie welkom aan julle, ons glo en vertrou ons sal dieselfde waarde
kan toevoeg en langtermynverhoudings handhaaf, soos met ons gevestigde kliënte.
Baie dankie vir die vertroue en opregte dank vir die verwysings.
Beleggings/ welvaartskepping
Ons is trots en
dankbaar dat ons beleggings onder bestuur die afgelope 5 jaar met 36% per jaar
gegroei het. Rentekoerse het gedurende die jaar gestyg. Dit is goeie nuus vir
persone wat in Geldmarkfondse belê is, maar dit plaas diegene met skuld onder
geweldige druk. Geldmarkfondse bied tans rentekoerse van tussen 5-6%, dieselfde
as Suid-Afrika se inflasie syfer. Daarom moet daar nie te veel fondse hierin
belê word nie. Ons besef ook dat inflasie, oor die algemeen, heelwat hoër is as
wat die offisiële syfer aandui. Selfs konserwatiewe verpakkings presteer beter
as wat Geldmark bied, soos geïllustreer in onderstaande tabel.
In 2014 is die
ekonomiese toestande gekenmerk deur wisselvalligheid. Ons en ekonome is dit
eens dat verdere skommelinge in die markte sal plaasvind tydens 2015. Dit is
egter hier belangrik om nie kortsigtige besluite te neem nie, maar wel by
langtermyn doelwitte te hou. Ons en alle fondsbestuurders beoog om teiken
fondsprestasies te behaal, of selfs uit te presteer oor ʼn drie jaar rollende
termyn.
Ons portefeuljes se
prestasies is uiteengesit in 1 jaar, 3 jaar en 5 jaar termyne. Die groei is die
gemiddelde groei per jaar. Geldmark is vergelykbaar met ʼn Konserwatiewe
risikoprofiel en JSE ALSI 40 en Satrix 40 is vergelykbaar met ʼn Aggressiewe
risikoprofiel. Hierdie prestasies is Netto prestasies.
|
Risikoprofiel
|
3 Jaar Teiken Prestasies
|
1 Jaar
|
3 Jaar
|
5 Jaar
|
|
Konserwatief
|
Inflasie + 2%
|
8%
|
10.37%
|
9.97%
|
|
Versigtig
|
Inflasie + 3%
|
8.62%
|
11.95%
|
11.26%
|
|
Matig
|
Inflasie + 5%
|
10.31%
|
14.78%
|
13.32%
|
|
Matig aggressief
|
Inflasie + 7%
|
13.27%
|
19.58%
|
17.24%
|
|
Aggressief
|
Inflasie + 9%
|
13.8%
|
20.22%
|
17.88%
|
|
Geldmark
|
|
5.47%
|
5.19%
|
5.6%
|
|
JSE ALSI 40
|
|
10.05%
|
14.52%
|
12.66%
|
|
SATRIX 40
|
|
10.28%
|
15.23%
|
12.67%
|
Ons is dankbaar en
trots op die beleggingshuise wat ons gebruik vir hul deursigtige werkswyse
asook die magdom bruikbare informasie wat hulle verskaf.
Gelukwensinge
Baie geluk aan al ons kliënte wat hulle studies voltooi het. Ons is trots
op julle.
Baie geluk aan Dillon Daniels wat sy nasionale kleure in bofbal en sy
provinsiale kleure in sagtebal verwerf het. Indien daar van julle is wat
prestasies behaal het, stel ons asseblief in kennis sodat ons saam met julle
kan trots wees en kan deel met ons kliënte en assosiate.
Inspirasie
Twee jong manne van
Hermanus, Josh Henn en André Barnard het hul lewens gewaag deur iemand te red
van verdrinking. Julle onbaatsugtige diens is ʼn inspirasie. Gaan kyk gerus na
die video:
www.nsri.org.za/2014/02/hermanus-kayak-rescue.
Josh se pa, Henk, is al ʼn jarelange kliënt van ons. Henk is self die
bevelvoerder van die NSRI op Hermanus.
Studies
Ons hou tred met
die voortdurende veranderinge in die bedryf deur gereelde werkswinkels en
seminare by te woon. Ons doelwit is om altyd die beste eietydse diens te kan
lewer aan ons gewaardeerde kliënte.
Belastingaanslae
Ons het geregistreer
as ʼn belasting tegnikus by S.A.I.T. Alle belastingaanslae is reeds vir die jaar
suksesvol ingedien en afgehandel. S.A.R.S. raak elke jaar toenemend strenger
met die erkenning van aftrekkings. Bewaar asseblief die bewys van betalings vir
julle mediese uitgawes vir vyf jaar. Slegs voorgeskrewe medisyne en mediese
kostes wat nie deur die mediese fonds gedek is nie kan geëis word. Indien
motoruitgawes geëis word, moet ʼn volledige logboek ingedien word. Stuur jul
belastingdokumentasie so spoedig as moontlik om die aanslae vroegtydig vir
volgende jaar af te handel.
Hartseer
Ons dink aan almal wat deur ʼn krisis gaan soos ʼn egskeiding, siekte of in ʼn
ongeluk betrokke was. Ons wens julle voorspoed, beterskap en sterkte toe. Ons
dink steeds aan die Koopman- en Labuschagne-families wat ʼn geliefde aan die dood moes afstaan gedurende die jaar. Piet Labuschagne
was ʼn vriend van ons familie vir
meer as 30 jaar en sal inderdaad gemis word.
Boedels/ testamente
Dankie aan Visagie,
Vos en Vennote vir julle kundigheid en persoonlike diens. Soos altyd, kan ons kliënte
getuig van flink en professionele afhandeling van boedels.
ʼn Spesiale woord
van dank aan Petri Lourens, senior regsadviseur by Ou Mutual, vir sy kundige
advies en beskikbaarheid. Hy doen altyd meer as wat van hom verwag word.
Korttermynversekering
ʼn Onlangse
gevallestudie het die rondte gedoen waar ʼn kliënt ʼn vals eis ingedien het en as
gevolg daarvan is die eis afgekeur, sy korttermyn gekanselleer en geen ander versekeraar
wil hom nou aanvaar nie. Maak asseblief seker alle inligting is waar en korrek wanneer
’n nuwe korttermyn polis uitgeneem word en ook wanneer ’n eis ingedien word.
Ons praktyk se
beleid is om die beste, nie noodwendig die goedkoopste, produk vir ons kliënte
aan te bied. Een van ons kliënte het in 2009 ʼn inbraak eis gehad. Daar was
persoonlike besittings gesteel ter waarde van
R97 213,53. Die kliënt het R14 698,33 in kontant
ontvang en ʼn koopbewys van R82 515,20. Tydens Oktober 2014 is van die items wat in 2009 vervang
is weer gesteel. Die kliënt het versoek vir ʼn kontantskikking
en daar is ʼn bedrag van R40 723 aan die
kliënt uitbetaal. Hiermee bewys dat kliënte moet bly by gevestigde versekeraars.
Kommunikeer asseblief met ons indien julle ontevrede is met jul premie/ diens sodat
ons dit kan aanspreek. Moet nie net van versekeraars verander sonder om ons te
kontak nie. In die meeste gevalle kan ons ʼn plan maak.
Statistieke bewys
dat tradisionele versekeraars ten minste ʼn 70% eise uitbetalingsverhouding
handhaaf teenoor 52% by direkte versekeraars. Maak asseblief seker dat julle
ten alle tye voldoende verseker is. Vervangingswaardes van geboue en huisinhoud
neem jaarliks toe en motors se boekwaardes moet jaarliks aangepas word.
Vir navrae tydens die Kerstyd wanneer ons kantore gesluit sal wees:
Mutual & Federal kliënte Tel:
021-506 0100 (Eise)
Tel: 0860 247 365 (Na-ure noodgevalle)
Tel:
0860 637 373 (Navrae)
Santam Tel: 0860 505 911 (Eise en na-ure noodgevalle)
Tel: 0860 726 826 (Alle navrae en wysigings)
Auto & General Tel: 021-527 8666 (Alle eise,
navrae en wysigings)
Tel: 0860 104 210 (Na-ure noodgevalle)
Lewens-/ ongeskiktheid/ trauma voordele en eise
Ons kantoor bemark
nie sekere maatskappye se produkte nie oor etiese redes. Ons kan steeds met
trots sê geen polis deur ons bemark se eis was al afgekeur nie. Die
versekeringsmaatskappye stel sekere vereistes by veral trauma en ongeskiktheidseise
om die eis te kan finaliseer. Wees asseblief geduldig en voorsien die nodige
dokumentasie om die proses te bespoedig. Ons bepaal die risikodekking op grond
van ʼn Finansiële Behoefte Ontleding (F.N.A.) en hierdie ontleding moet jaarliks
hersien word aangesien finansiële situasies voortdurend verander.
Nie-rokers bespaar
tot 40% op hulle versekeringspremies. In kliënt Henk Henn se geval het hy R2 000
per maand gespaar toe sy status van roker na nie-roker verander het. Hy moedig
dus almal aan om op te hou rook. Baie dankie vir jou voorbeeld, Henk.
Daar is fantastiese
nuwe Aftree annuïteite op die mark wat bonusse aan kliënte by hul fondswaardes
voeg. Kontak ons vir ʼn voorlegging. Ons sal ook almal se situasies individueel
evalueer met ons hersieningsafsprake.
Hersieningsafsprake
Baie dankie vir al
ons kliënte wat hul halfjaarlikse of jaarlikse afsprake so getrou nakom. Ons is
toegewyd en word verbind in ons diensvlakooreenkoms met julle dat ons dit van
ons kant af sal nakom. Dit is belangrik dat ons julle portefeuljes en moontlike
veranderde behoeftes sal hersien en aanpas. Dis veral belangrik dat ons
beleggingskliënte se portefeuljes hersien en aanpas volgens die risikoprofiel. Ons
moedig julle aan om enige veranderinge of vrae voor ons afspraak met ons te
bespreek, sodat ons die nodige voorbereidings kan doen. Gaan julle bankstate
noukeurig na of vra ons hulp om seker te maak geen aftrekkings word verhaal
sonder julle medewete nie.
Webtuiste
Besoek gerus ons
webtuiste: www.tvzfinancialservices.co.za en lewer kommentaar op ons Facebook bladsy. Baie dankie
aan Tina Vlok van www.berryweb.co.za wat ons webtuiste ontwerp het en voortdurend
bystaan.
Dankie vir al die
terugvoering vanaf ons kliënte. Jul terugvoering stel ons in staat om ons diens
te verbeter.
Agter die skerms
Ons het vir baie
jare nou saamgewerk met ʼn groot pensioenfonds. Ons het onder andere vir die
werknemersverskillende risikoprofiele geskep. Baie dankie vir julle positiewe
terugvoering.
Ons kliënte is ook
positief oor die verbeterde Finansiële Behoefte Ontledingsprogram asook die beleggings
se sigblaaie wat rand/ sente na kostes duidelik uiteensit.
Daar is ongelukkig
steeds “onetiese” adviseurs wat kliënte se pensioenfondse teiken, ongegronde
advies gee en polisse voortdurend skuif sonder goeie rede. Die Raad van
Finansiële Dienste (F.S.B.) se beginsels is nou gepubliseer om die wanpraktyke te
staak. Ons ondersteun die voorstelle ten volle vir ʼn professionele bedryf.
Voldoening
Masthead is steeds
die grootste netwerk van makelaars en ons werk nou saam om ons bedryf
deurlopend te verbeter. Dankie vir Herman Hesse, ons voldoeningsbeampte, wat
ons voldoening kwartaalliks monitor.
Dankie ook vir
Anzel Jewaskiewitz, ons praktykbestuurder. Ons is besonder trots op ons besigheidsontwikkelingsverslag
waar ons 96% behaal het en die eerste keer vir Kliëntetevredenheid (Client Fulfillment) 100%.
Persoonlik
Ons dogter,
Kirsten, was vir ʼn jaar in ons diens om al ons kliënte se afgehandelde
dokumentasie elektronies te skandeer. Die projek is suksesvol afgehandel en sy
werk nou in Amerika. Vir die eerste keer in 33 jaar is die van Zyl huishouding
nou sonder kinders. Elmarie, wat die korttermyn hanteer, sal weer volgende jaar
in die oggende werk van 8:00 – 13:00. Elmarie werk alreeds 15 jaar by ons en
Janneri sal Januarie 2015 10 jaar by Toni van Zyl Finansiële Dienste wees. Ons
waardeer en is dankbaar vir jul toegewyde en getroue diens.
Ons waardeer al ons
kliënte en is dankbaar ons besigheid groei steeds elke jaar. Ons is positief en
sien geweldig uit na 2015 met sy nuwe uitdagings.
Ons kantore sluit
op 19 Desember en heropen 5 Januarie 2015. Ons sien uit na die ruskansie.
Geseënde Kersfees
en voorspoedige Nuwejaar!
Baie groete
Van ons almal by Toni van Zyl Finansiële Dienste
